Huwebes, Hunyo 16, 2011

Hinog



Kun bukgan kaw, lisod ituyon. Mag-alingasa kaw kay kalain bagan sa liog jaon jaoy mobaybag kada tuyon. Jaoy mga tawo na abtik mohilot na matulon mo da an bukog... an iban magkuha nan miya na kumagat hampan ipahikap sa hajop an parte sa liog na jaoy bukog. Jaoy mga tawo sab na ila laway an ihapyas para mawaya an bukog. Pero epektibo sab gajod an hinog. Isan na kun litungdan na hinog kundi ba jaon morado. Kun gusto na mahamok na unod, jaon taglaong na bunguyan.

Inday uno na hingkanganlan man sab jaon na hinog. Kay kun sutaon gajod adjective man sija. Ripe kun sa iningles pa. Hinog na saging gajod dapat pero dinhi sa ato basta gani hinog, saging na jaon an buot ipasabot. Siguro kay sa una, ya may lain madali-dali na prutas kundi saging da. Makakaon nan mangga na kinarabaw kun kabahawan gikan sa mga syudad. Isan na nan jaon mansanas, bagan pasko da man jaon motunga.

Jaoy di karajaw ta kasabot sab na mga butang na epektibo baja. Parehas jaon mabanga nan malaya na mamang, kun way epikasin, magkaswit da kuno sa kwan… bagan di man nak matukod kay bas makalaong kamo na kabastos sab. Inenglison dakan nako kay kun hubak bitaw asthma man… (Reproductive organ) nan baji. Hangtod kuman magkabuyong gajod ako kun unoy jaon did-on na hasta an ak mga tiya molaong man gajod na tinuod. Anti-inflammatory sija? Aw uno ba. Bagan kinahanglan gajod siguro jaon estudyohan kay para jaon nay tambay kun mabanga ta an uhipan!

OK da jaon mga garabo sa dukoy kay jaon na may gajod pruweba nan mga abtik sa Science. Ugsa bagan mahibuyong sab ta amo? Na, jaon sab likit. Kun jaoy mga butang na hikit-an na di kun ordinaryo, himuon dajon na likit. Kun jaoy bayabas na may baga-holen kadako na liso, himuon dajon na likit. Hasta gan jaon kyamoy nan mga santos sa simbahan tan-gabas kay taghimo na likit hasta habak! Umay gahom nan kuyo ni San Jose? Umay enerhiya na jaon sa barhibo nan uwak na pink an kolor? 

Hala dakan lam kay aja ak katampa ni Tay Endong kun ak gajod surang-surangon jaon ija mga tinuohan. Basta kay dad-an ak nija nan alimango na nagbuyawan, sige dakan lam jaon ija taglaong na mga jatot. Di daw ak magsaba iniglabay dapit sa dyakit kay kun masampalo ak nan mga di kun singod dato, mahiwi daw ak baba labay pa sa nag-stroke.

Ak da sab i-istorya dinhi an ija mga kukabildo sa mga agta sa kasanihan hasta kan Dinay sa Panikian…

Magkwarta ak nay nan hinog kay bagan tabo sa Cantilan. Di ak lam maghamok pagkaon kay maka-toboy kuno an hinog pareha sa bayabas.

Na hala, ari ak anay. Sa mga nangaon, di ak nijo paghigabaan, libuta an ijo plato.

(kodak: jjexports7.tradeindia.com)


2 komento:

  1. Ugsa seguro hinog ang tawag Polong kay syorkat man an ato sinultihan. Di man gud makaon iton hilaw na saging ugsa ilaong hinog na saging. Nakay lagi syorkat man an at sinultihan, hinog rakan. Jadto sa im laong na ikablit sa tagudaya, tinood jaon kay taghimo ko na. Natunok ako nan boras. Sa ako tan-aw jaon kemikal nan ihi amoy seguro makakontra.

    TumugonBurahin
  2. haha lagi daw bisan danggit pay makatunok hampan malaya magkaswit da. tnx sa input. katawa ko gajod!

    TumugonBurahin