Magkagod

(photo: pinoyasianstore.ch)

"Ay na wayong ton, umay labot!" arang kakusog an jagting na tigaw ni Pinong.

" Kay uno!" bagan kahajaon na si Noling kay sige lam sija sawajon nan gwatse nija na higaya.

" Jaon may gud kandiis! An ak labot hamok na kandiis, ugsa an im wayong, amo ra labot!" hampan nagkadajang-dajang dajon na kumatawa si Noling...

Nan gamay pa sab si Dario, sige lang-on na maldito inig dako kay duhay biliboy! Ana kay pagdako nija kay nagsayal na man hasta nagpabugnot nan kilay! Pinta mopanaw, umay homba ton labot molabjog! Maghibig-hibig gud an hawak! Waya mo-epekto an gahum nan biliboy! Milaong ija iya na balisa daw na pagkabiliw an biliboy ugsa bajing si Dario!

Si Endat sab kinahadlokan kay itom daw na alingag-ngag. Mag-ajag tanan kay kun unoy daw isulti na mayaot, dautan an ija awajon. Molaong kita sija na: Di dakan kaw tana bukgan nan malaya! Matinuod gajod kuno! Mag-antos nan pila ka adlaw nan bukog na nagbaybag sa tutunlan! Bisan pila pa ka hinog an kan-on di gajod mawaya. Tobjon na lam an himbukgan kay isa na ka bulig hapit na saging an kan-on!

Mahamok man lam adto na mga signos... Kun jaoy sab disoy sa mata, magkapuliki kaw na tubag kay lang-on man kaw na nanilib sa im lola! Maghanap dajon nan kisoy na tanom para idapi an dahon sa may naghubag... hampan kun alindagawon kaw, maghanap nan baji na haba an buhok kay pabunajan nan buhok para mawaya an alindagaw...

An gana gajod dumdumon jadto storya nan mga tangihajan nan Engkanto. Sa dako daw na acacia sa likod nan eskuylahan, amo jaon an palasyo nan mga di-kun-singud-dato. Si Gaga kay medyo gwapahon sab, tangihajan daw nan prinsepe nan mga engkanto. Nakakadto daw sija nan iska oras pero iska adlaw sija nawaya sa ila. Ugsa hangtod kuman jaoy magduha-duha pagkaon nan tapoy na malagkit kay amoy daw jaon pagkaon nan mga engkanto!

Ugsa nan si Teray na an nalipong kay tag-engkanto daw, arya na sab si Pinong: Ay na baba to im Teray, hai mayujag ton engkanto dimo na umay dim buyad na dahontobo! Hangkay-hangkay na! Pinta da kan lam na haja ni Teray kay nabaraw an ija arya na tag-engkanto sija!

Pero daan na an ak amigo naglibog sa una: Laong di-kun-singod-dato? Na uman molaong man lagi ta na: Tabi tawo! kun jaoy at ilabak sa likod? Tawo baja sab sila?

Ay na inday! Magkagod ak anay. Haman adto kabayo nam na kagdanan?

Tabudlo

"Lakso kay bag-ong tuig na para motaas!" amoy laong ni Tiya Metring. Mipiktaw kaw sab para di kaw kun pareha kan Bokbok na potot! Si Hilario isab, tagbira-bira an ija ilong para mohaba kay malat kuno. Taud-taud, nangutana na sab si Iya mo: Umay hajop na mitingog? Milagtong kaw kadali kay im tagdumdom kun uno... "Bagan mga manok man adto Iya an mikakak..." amoy im tingog. "Nay, malisod ta kuman baja na tuig, magkakha-tuka ta ini kay aton mga manok may mitingog!"

 Para sa imo bagan kalooy sab nan iban na hajop na di makatingog pareha nan hayas, buaja, milo, tabili... bagan di na man jaon sila panhidunggan kay magkanaas na man an mga taro na gujoron. Tangtangan dajon ni Penong an ija motor nan tambutso, saba-saba na umay aja utong! Di kaw raba paangkason ni Nanay mo sa ija kay bas daw madisgrasya. Masina kaw sab jadto mga bata na magkiskis nan palito nan posporo kay putson nan jaon sa kilid na amo ra liha. Buntujan dajon nan dako na bato, paka-paka na an pagbuto!

Pag medya-noche, ganahan kaw gajod kun magluto si Nanay mo nan bihon. Kun nakakuha si Iyo Siloy nan kagtang sa kasanihan, amoy hingud-on para isubak sa bihon. Arang kalami. Sahay sagulan nan ginisa na bebe, jaon gagmay na tuway. Hakop dajon kamo imo mga lumon isan kun kapalit nan Amerikanbrid na pan, ipalaman ton bihon na punto da na toyo an tagsagol para di kun tim-as... 

May isa ka bag-ong tuig na naka-ambit si Tatay mo nan bag-ong humay na abot nan pangulilang amoy tagsukad. Pagsangay mo nan kan-on, nahikurat kaw pagdajaw kay tagdanog kaw ni Popo mo: Sulig, sulig kay bag-ong humay! Amo baja jaon, danugon kun bag-ong humay an kan-on...

An im mga silingan na bata na arangon kintahay an mga kahimtang, magkaon-kaon sila nan tsokolet. Pero di man kaw masina kay pareha da man jaon na lami sa tableya na isagol sa lugaw para tsamporado! Mga arte jaon sila kay di gan mokaon nan bokgay. Pero kamo, na ganing gajod magtohil nan bokgay isan na kun dugi nan buongon an ituhil! Tignos an lami nan bokgay!

Ugsa kuman bag-ong tuig, magpahikaon kaw gajod kay nagluto sab si Tiya Metring nan bogoy hasta budbod na kalibre tapos man suyod dolse na botong. Basta kay mosulig kaw hasta motaas, payts na...

Kay sa Enero hasta Pebrero raba mauyan na, ligwatay daw na luwag, amoy laong ni Popo... Magsugod na kaw sab pag-anad pagkaon nan tabudlo, basa-basa na may tangyad... 

(kodak nan lugaw: marketmanila.com)