Jaoy mga butang na bagan gusto nato himuon na waya pa nat katestingi. Isan na kun bagan nabantajan nimo na nagkadako na an imo edad. Pareha nan jaon taglaong na wakeboarding, uno kaha gajod jaon kagana na mangadto man an iban sa CamSur para da magpabira sa speedboat hampan inig lagpot magbiliw-biliw sa hangin? Di kaha kun sakit inig dapinak mo sa tubig?
Pero di sab bagan ak nan jaon. Isan na jaon skydiving. Hajabon na man gani ako nan jadto ikapito na andana nan ak eskuylahan sa kolehiyo, isan na jaon ihuyog kaw sa helikopter para motuligsok sa kawanangan! Nanay, inday makatil-is ak pangihi inig sugod ko pagkahuyog! Hain pak makatalinungnong pagbira nan jaon pisi para mobukyad an parakyut!
May ak higaya na "curios" gajod sija. Gusto nija testingan tanan basta lamang. Bahala na kun magkapanggos sija, moentra gajod sija nan jadto mga lumba nan Easy-Rider sa una. Magplete sila kan Mano Junior nan jadto na mga bisikleta tag-piso an oras para maglumbaay didto dapit sa Baybay. Ayang-ayang, di gajod sila magsaba na aja baja sila maglanat kay kaisgan sila ni Mana Salet, asawa ni Mano Junior. Pero bagan kuntento gajod ija pamati pagkahuman kay modayag gud sija sa amo balingbing para kami mangaon nan hinog na prutas. ( Isahay matod jaoy mga uyod jadto na mga balingbing malakip nam pag-ingkib... ya man lamang.)
Uman matod bagan ya na man maka-testing an mga batan-on kuman mangaon nan tambis na hamok na suyomsuyom. Hisul-ipan gud kaw kun ituslob an tambis sa suka na jaon gani may sagol na sili hasta luj-a na may sab ahos? Adto kami sa ila Mana Minda mangaon kay gana ila suka. Ibutang dajon an suka sa sartin na plato hamokon an asin. Star lagi an porma nan isa ka net bag na balingbing na ilabon kun mahurot na an tambis.
Ugsa bagan malintar ta kun jaoy mga kabag-ohan sa ato palibot kay simple da man an lingaw sa una. Manhinumdom gajod ako nan Skylab (brand) na radyo nila Mana Pina. Magdapog kami kay mamati nan drama na Ramatar hasta jadto Handumanan sa Usa Ka Awit nan DYHP. Pero di lam kamo makatamay kay naabre nuon an amo imahinasyon nan jadto kay kami da man an magporma nan mga eksena sa am huna-huna. An amo mga bugoy-bugoy Verboten an pamation...Inday uno an naabre sa ila uyo nan jadto!
Ugsa bagan kita isab na nagka-edad na kibali gusto pa gihapon mosabay sa mga batan-on bisan di na karajaw kasabot kun uno jaon na mga butanga. Pareha jadto am tapad sa simbahan nan Domingo na mag-asawa na hurot na minjo an bata, nagdaya nan telepono na an ringtone gani jaon arang katanog na tukar? Umay kita ija tasidaya nan jadto sa simbahan, jaoy ija taghuyat na mensahe gikan kan Noynoy? Naglisod sija pagpislit na di na matanog an telepono kay nagbayaw na raba si padre: Pinaagi Kaniya, Uban Kaniya, Diha Kaniya....
Balikon dakan siguro nak an jadto mga butang na gusto nak himuon sa una na ya na nako matilawi kuman. Mas may dating bagan an panlanat nan karaykay na puya an kimpit kay sa aton mag-zipline sa Bohol. Karajaw da magsugba nan bangus sa kilid nan suba kay sa aton mag-bungee jumping, aja ta hino kabungi...
Ay lamang, na hala kay maghanap pa nan panihapunon...
(kodak:kanjirobatrekking.com)
